दोन दिवसांपूर्वी फेसबुक वर एक मीम बघण्यात आले त्यात एका बातमीचा स्क्रीन शॉट होता. बातमी होती.
Flat Earthers say that they have community all around the globe!
फ्लॅट अर्थ आणि ग्लोब या दोन्ही परस्पर विरोधी गोष्टी आहेत! ग्लोब म्हणजे गोल जग. जगामध्ये पृथ्वी सपाट आहे, असे मानणारे देखील लोक आहेत याचे आश्चर्य वाटले. त्यांच्याविषयी माहिती शोधण्याचा प्रयत्न केला व अतिशय वेगळी आणि आश्चर्यजनक माहिती समोर आली. पृथ्वी ही गोल नसून सपाट आहे, असे मानणारे लाखो लोक या जगात अस्तित्वात आहेत, असे समजले आणि विशेष म्हणजे त्यांनी त्यांची "फ्लॅट अर्थ सोसायटी" नावाचा जागतिक संस्था देखील बनवलेली आहे! दोन वर्षांपूर्वी या लोकांचे जागतिक संमेलन देखील भरले होते!
पृथ्वी गोल आहे आणि ती सूर्याभोवती फिरते, हे निकोलस कोपर्निकस याने सर्वप्रथम सांगितले आणि सिद्ध देखील केले. त्यानंतर अनेक शास्त्रज्ञांनी पृथ्वी गोल आहे हे वैज्ञानिक दृष्ट्या सिद्ध केले होते. कालांतराने संपूर्ण जगाने देखील हे मान्य केले की पृथ्वी गोल आहे आणि ती सूर्याभोवती फिरते. परंतु एकोणिसाव्या शतकामध्ये इंग्लंडमधील एका व्यक्तीने पृथ्वी नक्की गोल आहे का, यावर शंका उपस्थित केली आणि एका प्रयोगाद्वारे सिद्ध देखील केले की पृथ्वी गोल नसून सपाट आहे. पॅरालॅक्स नावाने हा व्यक्ती संबोधला जातो. इंग्लंडमध्ये एक दहा मैल लांबी असणारा सरळ कॅनॉल आहे. या कॅनॉलमध्ये दुर्बिणीचा वापर करून त्याने सिद्ध केले की पृथ्वी सपाट आहे! पृथ्वीला गोल म्हणणे ही वैज्ञानिक अंधश्रद्धा आहे, असे त्याचे म्हणणे होते. त्याने अनेक चित्र विचित्र प्रयोग करून सपाट पृथ्वीची संकल्पना मांडली. हळूहळू पृथ्वी सपाट आहे हे मानणाऱ्या लोकांची संख्या देखील वाढत गेली. तुम्ही विश्वास करू शकत नाही की अमेरिकेमध्ये फक्त ८४ टक्के लोकांना वाटते की पृथ्वी गोल आहे आणि विशेष म्हणजे २० ते ४० या वयोगटातील ६४% लोकांनाच असे वाटते की पृथ्वी गोल आहे. हे सिद्ध करण्यासाठी त्यांनी वैज्ञानिक दृष्ट्या चुकीची परंतु आपल्याला पटतील अशी कारणे देखील दिलेली आहेत. जसे की विमान हवेत उडताना पृथ्वीला समांतर उडत असते. त्याचा पुढचा भाग कधीच खालच्या दिशेने नसतो म्हणजे पृथ्वी सपाट आहे. विमानात तुम्ही समांतर पातळी तपासण्यासाठी चे उपकरण अर्थात लेवल इंडिकेटर नेले तर ते पूर्ण प्रवासात तुम्हाला समांतर पातळी दाखवते, असा जबरदस्त सिद्धांत "सपाट पृथ्वी" वाले मांडतात. त्यांच्या म्हणण्यानुसार पृथ्वीच्या कडेला मोठमोठाले बर्फाचे कडे आहेत ते तोडून तुम्ही जाऊ शकत नाही. उत्तर ध्रुव आणि दक्षिण ध्रुव हे पृथ्वीच्या दोन कडेला आहेत. असं सपाट पृथ्वीवाले म्हणतात.
विशेष म्हणजे त्यांच्या सिद्धांतानुसार पृथ्वी वगळता सूर्यमालेतील सर्व ग्रह हे गोल आहेत! पृथ्वीला जर सपाट म्हटले तर पूर्ण जगामध्ये एकच टाईम झोन वापरावा लागेल आणि दिवस बदलायचा असेल तर पृथ्वीला सूर्याभोवती नव्हे तर सूर्याला पृथ्वीभोवती फिरावे लागेल! ही सर्व मूर्खांची गंमत म्हणावी अशीच आहे. पृथ्वीला सपाट सिद्ध करणारे अनेक व्हिडिओ तुम्हाला युट्युबवर दिसून येतील. शिवाय "व्हॉट इफ" या सुप्रसिद्ध चॅनेलने देखील या विषयावर एक सुंदर डॉक्युमेंटरी तयार केली आहे. ती नक्की पहा. अर्थात "जर पृथ्वी सपाट असती तर?" या विषयावर ती असल्याने त्यांच्या म्हणण्यानुसार देखील पृथ्वी गोल आहे, असंच सिद्ध होतं. सपाट पृथ्वी सिद्धांत मांडणाऱ्या एका व्यक्तीने काही वर्षांपूर्वी स्वतःच रॉकेट तयार करून अवकाशात झेप घेतली होती! जेणेकरून त्याला हे सिद्ध करायचं होतं की, पृथ्वी सपाटच आहे. तर्कशास्त्र बाजूला ठेवलं तर सपाट पृथ्वीवाल्या मूर्खांच्या बाजारात आपण देखील सहजपणे सामील होऊ शकतो. तुम्हाला काय वाटतं काय करायचं?
Ⓒ Ⓐ तुषार भ. कुटे
