हॅरियर ईव्ही

मागच्या काही दिवसांपासून चालू असलेला हॅरियर ईव्ही गाडीचा शोध आज अखेर संपला. नवीन गाडी घेण्याच्या दृष्टीने अमोलने हॅरियर ईव्हीची निवड केली होती. अर्थात यासाठी अन्य पर्यायही उपलब्ध होते परंतु रश्मीला आणि मला हॅरियरच सर्वोत्तम गाडी आहे, हे माहीत होते. त्या दृष्टिकोनातून टाटा मोटर्स विविध शोरूममध्ये आम्ही चौकशी केलेली होती. सर्वच ठिकाणी जवळपास सारखीच किंमत सांगण्यात आली. शिवाय या गाडीसाठी रंगाचे पर्यायही मर्यादित होते. त्यावरूनही बराच खल झाला. नैनिताल ब्लू, प्युअर ग्रे तसेच पूर्णतः काळ्या रंगाच्या गाडीचाही विचार केला गेला होता. बऱ्याच ठिकाणी वेगवेगळ्या प्रकारच्या गाड्या बघितल्या. तरी देखील त्यांचा निर्णय होत नव्हता. परंतु आज अखेर प्युअर ग्रे रंगाच्या गाडीवर शिक्कामोर्तब झाले. मागच्या पाच दिवसांपासून माझे सीडॅकमध्ये ट्रेनिंग चालू आहे. आज देखील दुपारी साडेतीनला ट्रेनिंग संपून घरी आलो. तोपर्यंत यांचे गाडी घेण्याचे प्रयोजन झाले होते. आजच बुकिंग केली तर २७ जानेवारीला गाडी मिळेल. म्हणूनच आजच गाडीची बुकिंग पूर्ण केली. अखेर प्युअर ग्रे रंगाची गाडी ठरली. माझ्या नेक्सॉन आणि हॅरियर या गाड्यांमध्ये बऱ्यापैकी साम्य आहे. परंतु हॅरियरमध्ये नवनवीन वैशिष्ट्यांचा समावेश केल्याचे दिसते. शिवाय याची रेंज देखील पाचशेच्या वर आहे. त्यामुळे बऱ्याच लांबच्या प्रवासाला देखील गाडी वापरता येऊ शकेल. 
पंचजन्य ऑटोमोबाईलमध्ये गाडी बुक करत असताना केवळ मी आणि रश्मी होतो. ११००० रुपये देऊन बुकिंग पूर्ण केली. आणि २७ जानेवारीला गाडी येईल या प्रतीक्षेमध्ये इथून बाहेर पडलो.