महाराष्ट्रातील एका छोट्या शहरामध्ये व्याख्यानाच्या निमित्ताने जाणे झाले. तिथून परतत असताना एका हॉटेलवर जेवणासाठी थांबलो होतो. याच ठिकाणी इलेक्ट्रिक कार चार्जिंग स्टेशन देखील होते. ते अदानी इलेक्ट्रिसिटी या कंपनीने बांधले होते.
या कंपनीचे चार्जिंग स्टेशन मला पहिल्यांदाच पाहायला मिळाले. अर्थात यामुळेच त्यांचे अँड्रॉइड ॲप्लिकेशन माझ्या फोनमध्ये नव्हते. मी ते गुगल प्ले स्टोअरवर शोधले आणि इन्स्टॉल केले. हे ॲप्लिकेशन जेव्हा उघडले तेव्हा त्याने मला भाषेचा पर्याय विचारला. त्यामध्ये तीन भाषांचा पर्याय होता. इंग्रजी, हिंदी आणि गुजराती. महाराष्ट्रामध्ये सेवा देऊनही अनेक कंपन्या मराठी भाषेचा पर्याय देत नाहीत. यात विशेष नाही कारण अशा अनेक निर्लज्ज कंपनी आहेत ज्या मराठी भाषेला महत्त्व देत नाहीत. मराठी माणूसच ती मागणी करत नाही किंवा मराठी माणसालाच आपल्या भाषेचे काही देणे घेणे नाही म्हणून कंपन्यादेखील मराठीचा विचार करत नाही, हेही तितकेच सत्य. पण विशेष म्हणजे ज्या कंपनीच्या मालकाची मातृभाषा गुजराती आहे,तिचा पर्याय देखील या ॲप्लिकेशनमध्ये दिलेला होता. म्हणजे त्यांना आपल्या मातृभाषेचा किती अभिमान आहे हे यातून दिसून येते. आपले मराठी लोक मात्र सातत्याने हिंदी भाषेचा प्रचार करत असतात. आणि मराठीला नेहमीप्रमाणे दुय्यम स्थानी नेऊन बसवतात. त्यांच्यासाठीच ही पोस्ट.
शेवटी इन्स्टॉल केलेले ॲप्लिकेशन अनइंस्टॉल केले. कंपनीला मराठी भाषेचा पर्याय देण्यासाठी सविस्तर मेल केला. आणि परतीच्या मार्गाने लागलो.
No comments:
Post a Comment
to: tushar.kute@gmail.com