सिक्रेट ऑफ शिलेदार्स

डॉ. प्रकाश कोयाडे लिखित 'प्रतिपश्चंद्र' या सुप्रसिद्ध मराठी कादंबरीवर आधारलेली वेबसिरीज म्हणजे सिक्रेट ऑफ शिलेदार्स. ती प्रदर्शित झाली तेव्हाच पाहायची होती. परंतु काही कारणास्तव जमले नाही. आणि अखेरीस तो योग जुळून आला.

मी ही कादंबरी वाचलेली नाही. फक्त कथानकाची काहीशी कल्पना होती. हे कथानक छत्रपती शिवाजी महाराजांच्या सिंहासनाची राखण करणाऱ्या शिलेदारांशी निगडित आहे. पहिल्या भागाची सुरुवातच एका शिलेदाराच्या वंशजाच्या अपघाताने होते. आणि हळूहळू कथानक पुढे सरकू जग लागते. एकेका पात्राचा प्रवेश होतो. रवी नाईक हा शिवाजी महाराजांच्या सिंहासनाची राखण करणाऱ्या शिलेदारांचा वंशज आहे. आदित्य हा त्याचा भाऊ. कालांतराने त्यांना प्रियाली देशपांडे नावाची पत्रकार देखील सामील होते. आणि हळूहळू एकेका सुगाव्याचा मार्ग काढत कथानक वेग घेऊ लागते. जस्टीस दिक्षितांसारख्या व्यक्तीमुळे अनेक गोष्टींचा उलगडा होतो. रवीला तो शिलेदारांचा वंशज आहे, याची जाणीव देखील होते. गव्हर्नर रामचंद्रन जे स्वतःला विजयनगर साम्राज्याचे वंशज मानत असतात, त्यांची देखील एन्ट्री होते. पुढे ज्येष्ठ इतिहासतज्ञ सूर्यकांत चंद्रराव यांच्या कथनाकातील प्रवेशाने कथेला वेग मिळतो आणि दिशा देखील प्राप्त होते. अनेक सुगाव्यांमधून तसेच ऐतिहासिक घटनांचा व पुराव्यांचा वापर करून कथा वेगवेगळ्या ठिकाणी फिरत राहते. इतिहासाचे नवे पैलू उलगडू लागते. काही ठिकाणी त्यांना दगादेखील होतो. अनेकदा जीवावर बेतते. त्यातूनही मार्ग निघत जातो. आणि अखेरीस हा शोध विजयनगरच्या साम्राज्यातील खजिन्यापाशी येऊन थांबतो. परंतु हा शेवट नाही. शिवाजी महाराजांच्या सिंहासनाच्या शोधार्थ कथा पुढे सरकू लागते. आणि अर्थातच या थरारक कथेचा अनपेक्षित शेवट देखील होतो.
शिवाजी महाराजांच्या इतिहासाची निगडित कथानक असल्याने त्याची हाताळणी तशाच पद्धतीने करणे गरजेचे होते. यात लेखक आणि दिग्दर्शक दोघेही यशस्वी झाल्याचे दिसते. एक वेबसिरीज म्हणून जो स्पर्श आणि मांडणी हवी होती ती स्पष्टपणे दिसून येते. बाकी कलाकारांचा अभिनय उत्तम आहे. इंटरनेटवरील विविध माध्यमांद्वारे या वेब सिरीज विषयीचा विविध जणांचा अभिप्राय वाचला. त्यापैकी बहुतांश जणांनी कादंबरी देखील वाचली होती. अशा लोकांना ही वेबसिरीज फारशी आवडलेली नाही. कदाचित कथानकामध्ये काहीसे बदल केलेले असावेत. परंतु थरारकथा पाहणाऱ्यांसाठी ही उत्तम अशी वेब सिरीज आहे.

--- तुषार भ. कुटे