सत्तरच्या दशकामध्ये मराठवाड्यातल्या मानवत या छोट्याशा गावामध्ये अनेक लहान मुलींसह आठ खून झाले होते. त्या काळात खूनसत्राचा हा मुद्दा बराच गाजला. यावरच आधारित ही वेबसिरीज आहे, मानवत मर्डर्स .
कथेची सुरुवात होते पहिल्या खूनापासून. गावाच्या आजूबाजूला एकेकट्याने फिरणाऱ्या लहान मुलींना पकडून त्यांचा खून करण्यात येतो. परंतु बरेच प्रयत्न करून देखील स्थानिक पोलिसांना याचा छडा लागत नाही. आणि अखेरीस राजधानीतून रमाकांत कुलकर्णी यांची या खूनसत्राच्या तपासाकरता निवड होते. ते प्रत्येक खुनाचा चहूबाजूंनी तपास चालू करतात. त्यातून नवनव्या पात्रांची कथेमध्ये एन्ट्री होत जाते. अनेकांची चौकशी होते. हळूहळू खून सत्राचा रहस्यभेद व्हायला लागतो. सर्व कोणी का केले गेले होते? हे शेवटच्या भागांमध्ये समजते. तोपर्यंत ही वेबसिरीज आपली उत्सुकता ताणून ठेवते.
कथेतील पात्रांची निवड उत्तम आहे. रमाकांत कुलकर्णीच्या भूमिकेमध्ये आशुतोष गोवारीकर शोभून दिसतात. याशिवाय सई ताम्हणकर, मकरंद अनासपुरे, सोनाली कुलकर्णी हे देखील आपापल्या भूमिकेमध्ये समरस झाल्याचे दिसतात. या वेबसिरीजची सर्वात सकारात्मक बाजू म्हणजे याचे पार्श्वसंगीत. एखाद्या मर्डर मिस्टरीला साजेसे पार्श्वसंगीत देण्यात आलेले आहे. कथेमध्ये खिळवून ठेवण्याची ताकद या पार्श्वसंगीतामध्ये आहे. बाकी आशिष बेंडे यांचे दिग्दर्शनही उत्तमच. यापूर्वी त्यांचा आत्मपॅम्प्लेट चित्रपट पाहिला होता. परंतु दोन्हीही चित्रकथा या वेगवेगळ्या धाटणीच्या आहेत. सत्य कथांवरील चित्रकथा पाहताना आपण प्रत्यक्षात त्याच ठिकाणी त्याच काळामध्ये वावरत असल्याचे सातत्याने जाणवत राहते. हेच अशा वेबसिरीजचे यश आहे.
--- तुषार भ. कुटे.
--- तुषार भ. कुटे
No comments:
Post a Comment
to: tushar.kute@gmail.com